【時報訊】本港勞動人口下跌，唔少業界都話難請人，其中有美容業界代表噚日引述業界嘅調查話，每間美容院平均都有兩成或以上人手短缺，即使人工開支飈升咗15%至20%，一樣咁難請人。批發及經銷商代表都話，加薪10%至15%仍然好難聘請足夠嘅貨車司機同搬運工人。
經民聯立法會（商界一）議員林健鋒引述香港總商會日前公布嘅人才短缺調查，提到有超過七成受訪企業面對人才短缺問題，當中有逾八成嘅情况已維持逾一年，反映勞動力短缺持續惡化，建議政府應向其他地方政府借鏡，輸入外勞。
有見及此，經民聯向政府提出4個建議，包括主動從其他國家輸入外勞、針對唔同行業實况彈性制定輸入人手方案、探討輸入大灣區人力生活配套、加強本地青年技術培訓同生涯規劃，希望可以穩定人手。
