【時報訊】今年書展會喺下月19日至25日（周三至周二）舉行，主辦機構貿發局暫時未正式公布細節，例如今年嘅年度主題、星級講者等，不過有眼利嘅網民發現，貿發局已經喺網頁上載部分講座資料，而當中不乏政界人物，其中不時接受外國傳媒訪問嘅行政會議召集人、新民黨主席葉劉淑儀會講「大國博弈中的香港」。
至於葉太嘅黨友、新民黨副主席黎棟國就聯同選委界議員兼中銀香港總法律顧問簡慧敏（Carmen）講「提高治理水平，排解民生憂難」，黎sir同Carmen都係新選舉制度下嘅「新任議員」，相信佢哋都可以分享好多喺議會做「新鮮人」嘅經歷。
何君堯講「尊重法治」
另一選委界議員何君堯一向言論出位，今次佢會喺書展講「認識國家 尊重法治 健康成長」，唔知會唔會「語出驚人」呢？而今年退任人大常委嘅民建聯前主席譚耀宗，就會回顧佢從政40年嘅經歷，有興趣嘅市民到時應該大把古仔聽喇！
