【時報訊】營運18年嘅民間電台，噚晚播出節目《打橫嚟講》後結束營運。台長曾健成「阿牛」（前排左二）形容心痛及百感交集，部分義工同節目主持身處「牆內」或已離港，甚至已離世，對於見證大時代，一定銘記於心。
噚日約30個聽眾及歷任主持到場，阿牛向各人鞠躬，一度哽咽感謝義工、節目主持及市民多年支持，又話會努力賣畫以維持租用場地，「但18年嚟大家已成一家人，希望日後有地方聚腳」。
在場嘅次文化堂社長彭志銘話感謝「阿牛」多年嚟一力承擔壓力，喺社交平台未盛行前爭取開放大氣電波，又提供平台畀性小眾、爭取動物權益者等群體有發聲渠道，甚至畀未成名嘅音樂人「開咪」，部分人𠵱家已經有機會喺紅館表演，突顯民間電台嘅貢獻同重要性。
