【時報訊】位於西九文化區嘅M+博物館，自2021年11月開館以來，至今接待超過370萬人次參觀。M+噚日公布，為咗回饋公眾支持，同埋延續欣賞當代視覺文化嘅氛圍，今個夏季將會推出夏季優惠。
由7月29日至9月30日期間，正價門票會由原來嘅120元減至90元，優惠門票就由60元減至45元，後者適用於全日制學生、7至11歲兒童、60歲或以上長者、殘疾人士同領取綜援人士。
至於7月29日（周六）起開幕嘅全新特別展覽「宋懷桂：藝術先鋒與時尚教母」，正價門票140元，特惠門票70元，買咗特別展覽門票嘅訪客，就可以同時參觀埋M+嘅其他展覽。或者用咗優惠價買正價門票嘅訪客，即場補番50元票價差額，都可以一併參觀特別展覽，買特惠門票嘅就要補番25元票價差額，就可以參觀全館嘅所有展覽。
