【時報訊】世衛前總幹事陳馮富珍（Margaret，左）噚日重返母校新加坡國立大學，獲頒榮譽理學博士，另一獲頒榮譽博士嘅係新加坡前總統陳慶炎。Margaret致辭時以自己當年辭去教師，同男朋友（現任老公）去加拿大學醫嘅經歷勉勵畢業生。佢話當年喺加拿大讀書逢暑假都打幾份暑期工，靠少許收入熬過7年醫學院；話面對人生高低都要聚焦目標，困難時唔好放棄。
Margaret話，過去3年世界面對新冠疫情，更多文化互不相容，好似令未來更黯淡。但佢認為此時更加要樂觀，同世界不同地方年輕人分享知識，透過對話建立網絡，相信喺文化科研合作仍有大量機會。
