【時報訊】個人資料私隱專員公署今年聯同城大出版新書《私隱法．保——了解你的個人資料私隱》，售價208蚊。新書除咗介紹《私隱條例》嘅原則、真實案例等，亦加插咗介紹「起底」罪行嘅新章節，同埋探討人工智能、聊天機械人、元宇宙等新興科技所涉及嘅私隱議題；亦從多個日常生活角度，包括社交媒體、網購、在家工作、航拍機使用等，解答讀者較常遇到嘅私隱問題，仲會提供貼士。
公署會喺書展擺攤位推廣，亦會喺下星期一（24日）舉辦新書發布會暨「探討學生網絡欺凌和『起底』現象」講座。私隱專員鍾麗玲仲「食字」咁話，希望呢本書可以成為廣大讀者嘅「私隱法寶」，增加認識私隱「法」例嘅同時，亦可以更好「保」障個人資料。
