【時報訊】本港唯一紙包飲品盒回收機構「Mil Mill喵坊」嘅元朗廠房舊年不獲科技園續租，喵坊之前喺粉嶺坪輋搵到地重置廠房，預計下月進駐。喵坊噚日（21日）喺facebook分享坪輋新廠房照片，見到廠房上蓋同外牆已經大致起好。喵坊話元朗廠房已進入倒數階段，下月底會停止運作，搬入新廠房，又話新廠房位於工業用地，已獲政府核實可作回收製漿用途。
成本酷熱影響 再製漿或延至年底
不過，喵坊有一個壞消息，就係由於建築成本倍增、酷熱天氣等種種原因影響進度，可能要延至年底先可再投入製漿。但喵坊話咁係唔會影響回收服務，包括紙包飲品盒回收，又透露新廠房全面投入服務後會有新搞作——處理另類廢料，現保持神秘未講係咩廢料。喵坊話佢哋為香港減碳減廢嘅決心不變，懇請市民繼續支持。
相關字詞﹕喵坊 喵坊Mil Mill
