【時報訊】國家衛健委醫療應急司長郭燕紅率領代表團上周五（25日）起一連4日訪港，第二日就同醫衛局長盧寵茂去咗香港兒童醫院探望去年12月接受內地心臟移植嘅女嬰芷希。醫衛局噚日喺facebook話，郭燕紅一路抱住芷希，一路講好期盼見到佢，終於可以感受佢跳動嘅小心心，知道佢康復理想、快速成長，覺得非常感動同欣慰。
1歲嘅芷希戴住粉紅色頭箍、眼仔碌碌四圍望，攞住小火雞公仔，完全唔怕生保人，比局長上個月探佢時更精靈。Emily聽聞芷希手上嘅小火雞公仔係佢命根嚟，由做完手術一直陪住佢到𠵱家。帖文仲話郭燕紅送咗玩具，同埋象徵生命接力嘅「施予受」（Love & Hope）徽章畀芷希，芷希父母都準備咗心意卡畀內地專家同官員，更特別感激捐贈者父母嘅無私大愛。
