【時報訊】古物諮詢委員會近日上載文件，其中位於銅鑼灣禮頓道嘅二級歷史建築保良局主樓獲擬議升為一級；而建於1859至1897年、過百年歷史嘅上環城皇街石台階，則獲擬議列為二級歷史建築。古諮會下周四（7日）將開會討論，隨後古蹟辦會就擬議評級諮詢公眾一個月。
上環城皇街石台階擬列二級
根據保良局網頁，主樓建於1932年，啟用以來一直係兒童住宿設施，屬本港少數至今仍維持原來用途嘅歷史建築。大樓屬西式建築，採用新古典主義風格設計，圓頂係權力同公共機構嘅象徵，代表保良局喺香港有廣大認受性同支持。
除咗上述兩項建築，大埔錦山30號及土瓜灣變電站亦獲擬議列為三級歷史建築，兩者都屬私人業權；前者建於20世紀初，後者建於1949年。
至於位於觀塘嘅前佐敦谷水塘水壩、紅磡機利士南路嘅紅磡三約街坊福利會、紅磡差館里22號紅磡診所，則不獲擬議評級。
