【時報訊】政府近年推動STEM（科學、科技、工程、數學）教育，並大力發展創科。有青年組織日前就舉辦活動，安排逾400名來自約30間學校嘅中一至中三學生，去工程顧問公司研習體驗，部分學生仲跟隨工程師工作一日，體驗工程師之日常。
活動由非牟利機構青年成就香港部（JA香港部）與工程公司奧雅納合辦。工程師安排工作坊，同學生一齊動手，用回收物料建造大廈及橋樑，並使用風力及太陽能板發電，畀學生認識工程與可持續發展城市嘅概念。
奧雅納東亞區主席李旭年話，近年好多學生選擇報讀金融行業課程，過去10年工程界出現斷層，如果業界再唔積極鼓勵年輕人入行，未來20年嘅建造業發展搵邊個去做呢？佢都希望畀學生多了解工程，等佢哋對工程行業感興趣。
另外，大灣區共同家園青年公益基金同AI公司SenseTime商湯科技合作，喺本月免費為近1700基層學生提供AI課程，畀學生體驗AI科技，了解一下機械人及程式設計嘅應用，培養學生對科研嘅興趣。
