【Emily】NBA名宿馬貝利一日獲批高才通

對傳播籃球文化興奮 話港第三個家

馬貝利提到，2011年來港時喺李小龍銅像前許願，而願望已實現。佢話曾經多次來港，鍾意香港嘅人、文化、食物同氣氛，日後將協助慈善團體，為基層兒童同年輕籃球選手尋找資源同機會，相信香港喺發展籃球方面有巨大潛力。

馬貝利係A類申請人，即係申請前一年全年收入達250萬港元。勞福局長孫玉菡噚日書面答覆立法會議員質詢提到，截至上月底高才通計劃接獲約5.5萬宗申請，逾4.3萬宗已獲批，其中15,149宗屬A類申請、9782宗獲批。佢話約一半獲批A類申請人來自人才清單涵蓋嘅9個行業領域。