【時報訊】政府推動「夜繽紛」，西九龍文化區都有響應，政務司長陳國基及副財政司長黃偉綸周日晚就去咗西九參與「夜樂西九」活動，去咗大草地流動音樂會場睇表演，話觀眾可以安坐草地上聽音樂，感覺「零舍不同」。不過，陳國基都話「明白改變生活習慣需要持之以恒，不能一步到位」，因此政府會繼續聯同商界、零售界等伙伴舉辦更多晚間活動。佢又喺社交媒體話，大家參與「夜繽紛」活動同時，勿忘記12月10日區議會選舉投票。
講開夜繽紛，香港社會創投基金及發展局，聯同香港遊樂場協會，會於周五（24日）晚6點至10點於觀塘海濱「VESSEL 發現號」舉行「綠活閃動嘉年華GLOW GREEN Wellness Fiesta」，屆時會有夜光新興運動遊戲攤位、VR划艇體驗、免費夜光運動體驗班、LED滑浪風帆打卡位，以及本地青年音樂表演同社區綠活橋底市集。其中場地天橋底下設置3米高嘅充氣對戰滑梯，會加入反應燈競技（Reaction Jump），可以畀小朋友遊玩「放電」。
