【時報訊】各行各業同政府部門近年都開始應用人工智能科技，海關噚日開始就喺機場、香園圍管制站、港珠澳大橋香港口岸、高鐵西九龍站嘅出入境大堂禁區範圍，各設兩部虛擬海關服務大使「小慧」，解答市民同旅客嘅問題。旅客可以用廣東話、普通話或英語，甚至中英夾雜，以語音向「小慧」提問。不過「小慧」只可以解答關於海關同管制站嘅查詢，其他問題就會叫旅客打電話熱線等方式問番相關部門。
海關早前獲創科局資助約600萬元，委託本地科創公司研究虛擬海關服務大使。「小慧」身穿黑色制服，旅客可以問關於香煙稅款、食物入境等問題，佢會喺屏幕顯示相關法例同要求。如果旅客遺失行李，「小慧」就會指示旅客去行李詢問處。
不過，同海關無關嘅問題，「小慧」就唔太識答，例如噚日有記者問佢「肚餓點算？」「小慧」回應話：「抱歉，我現時未能找到相關資訊。」又建議致電熱線求助。又有記者問「點去元朗？」「小慧」都答唔到，但改問「點樣可以搭出市區」，「小慧」就列出各種交通工具畀旅客選擇。
