【時報訊】住喺海洋公園嘅鱷魚女近日「鱷氣」急升，除園方正為佢搞緊命名投票活動之外，據Emily從海洋公園獲得嘅傳媒採訪邀請得悉，鱷魚女已經遷入海洋公園內名為「鱷園」嘅新居，而呢個全新景點會喺下星期六（16號）起正式開放，畀公眾同鱷魚女見面，兼宣揚保育信息。
呢條雌性鱷魚舊年4月底出現喺八鄉蓮花地，海洋公園後來接收咗佢同提供照顧，當時經獸醫初步檢查，鱷魚女身長約1.9米、體重約35公斤，約4歲，表現活躍。園方早前透露，鱷魚女預計本月中同大家見面，𠵱家終於會面有期。至於命名比賽最後5強亦已誕生，投票結果會喺「鱷園」開放前兩日、即係下周四（14號）公布。
