「唱作王子」馮允謙（Jay）將於5月31日在澳門舉行演唱會，寵粉的他大派福利，持VIP票粉絲更可以睇埋綵排和獲得限量版小禮物。
Jay去年再踏紅館舉行一連三場，以音樂人生比喻電影配樂為主題的《the SOUNDTRACK of my LIFE馮允謙演唱會2024》，口碑載道，今年5月，Jay首次衝出香港在澳門開騷，歌單更會加入新專輯《EMO》內歌曲，以及剛派台全新作品《然之後》。
一向寵粉的Jay，今次更要求公司向fans派福利：「大家都知道我好愛錫fans，所以，其中有一樣連我自己都好喜歡，就可以sound check入嚟睇我唱歌！」Jay又說：「去年開完第二次紅館演唱會之後，好大嘅滿足感，有啲唔夠喉，好想再開多幾場，把聲仲可以唱多幾場，一直都好期待將呢個演唱會帶去其他地方，終於今次可以衝出香港去澳門開騷，所以我好感恩、好興奮，夢想成真！」
為帶給觀眾聽覺和視覺享受，Jay近日積極做GYM，希望以最佳狀態踏上舞台。同時他對澳門的葡撻和美食也非常期待：「我超級鍾意食嘢，經常同家人去澳門食嘢，每次都可以好放鬆，盡情旅遊，好多開心回憶！」Jay還興奮表示媽咪答應從加拿大飛來澳門捧場，令他非常開心。
