【時報訊】政府前年公布《青年發展藍圖》，當中提出設立以青年為本嘅手機應用程式。民青局噚日正式推出名為「HKYouth+」（圖）嘅應用程式，提供政府青年活動、介紹地區打卡點、公務員招聘等等嘅資訊。民青局話，已就應用程式蒐集過千青年同持份者意見，仲邀請過百青年參與原型測試，未來會繼續製作更多內容。
Emily噚日下載個App試用，入面分為「活動」、「熱話」、「資訊」等多個欄目。「活動」載列政府舉辦嘅青年活動，包括多項內地實習計劃、推廣國家安全活動等，亦有地區振興經濟活動，例如九龍城潑水節、葵青戲棚等。至於「熱話」就比較輕鬆，包括街訪短片、推介大灣區打卡點、介紹創業小知識等。應用程式亦提供實用資訊，例如投考政務主任（AO）同行政主任（EO）嘅須知。
局方話，個App內容包括個人發展機會、本地熱話、國家發展、藝術文娛、創新科技同身心健康等，用戶可獲取同佢嘅興趣相關，或者鄰近居住、返學、工作地區嘅活動資訊。個App支援iOS及Android作業系統，市民即日起可以免費下載。
