李幸倪(Gin Lee)今日出席全新專輯《Leap of Faith》簽唱會，獲數百歌迷到場支持，原定唱兩首歌的Gin Lee，見到歌迷反應熱烈，即場加碼清唱多一首歌，答謝大家支持。
活動上有歌迷扮成Gin Lee的愛貓「杏仁糊」給她驚喜，而Gin Lee又跟歌迷大玩遊戲，教歌迷擺「甫士」及猜歌名，而在唱歌環節，原定唱兩首歌，臨時加碼唱夠3首，其中包括新歌《無愧於當初的我》。
Gin Lee受訪時坦言只唱3首不過癮，但好開心可以跟歌迷聚會，最想當然是開演唱會唱個夠，而早前已入紙紅館申請，預計最快明年才有檔期。不過，她指其他場館都會考慮，因唱現場最開心，可以與粉絲直接交流音樂。
除了定期跟歌迷舉行聚會，Gin Lee表示，歌迷會有個義工團隊一齊做義工，之前就去過探訪、賣旗及捐血，問到可會成立慈善基金？Gin Lee說：「成立慈善基金手續比較繁複，要遲啲先，依家出力先，一齊做啲有意義嘅事，為社會出一分力。」她自言歌迷會目前人數只有千多人，歡迎大家入會，因人多好辦事。
提到再推出大碟，Gin Lee表示非常感動：「好多謝公司，呢個年代仲出到實體碟係好難得，好感動，我放咗好多生活相喺碟入面，仲有書簽、貼紙，（邊張相係比較特別？）有一張相係一支筆，係我簽約英皇時用嘅筆，支筆係一個見證，代表開始新旅程，所以好有特別意義。（將來簽婚書都係用呢支筆？）我唔知幾時結婚，唔知到時仲用唔用到，可能簽續約快過簽婚書。」她笑言要將筆鎖入保險箱好好保存。
另外，Gin Lee早前與炎明熹（Gigi）飯聚，她笑言識了Gigi幾年， 對方才首次請她食飯，實在老懷安慰：「佢好乖女，我經常請佢食飯架，佢以前細個冇零用錢，依家有少少錢可以請我食飯。我會再約佢，但佢最近學業比較忙，好大壓力。」說到Gigi在合約上的問題仍未解決，她有沒有鼓勵對方？Gin Lee倒不擔心：「我見佢個狀態好好，唔會太過擔心，佢自己有計劃，我同佢講如果佢需要搵人傾偈或者畀意見，可以隨時搵我，我冇問佢太多嘢，唔想畀壓力佢。（佢讀時裝設計，可以叫佢幫你設計衫？）好喎！係個好提議。」
她又指Gigi成熟不少，比以前更開朗及更大膽表達自己：「佢以前好驚講錯嘢，依家開朗咗，成日好搞笑，我畀佢笑死，諗法係好跳出框框。」
