【時報訊】通關後首個五一黃金周吸引大批內地旅客訪港，昂坪360噚日話，今年勞動節當日有超過8000個訪客，創疫情以來新高，較2018及2019年勞動節平均訪客人數上升8.2%。昂坪360又話，籌備超過3年、車廂四面同底部都採用全透明特製強化玻璃嘅「全景纜車Crystal+」自上年12月推出後反應熱烈，已經由最初嘅7部，增加到𠵱加10部。
上年昂坪360總到訪人數大約39萬，比起2021年上升兩成，平均每日1724人乘搭。而昂坪360纜車系統嘅平均可靠度亦創歷年最佳紀錄，上年平均可靠度高達99.97%，相等於每日營運8個鐘，唔超過1分鐘延誤。
昂坪360上年亦向基層家庭及有需要嘅人合共送出超過2500張來回纜車門票，回饋市民。
相關字詞﹕昂坪360
