【時報訊】香港機電工程商聯會調查發現，目前本港機電工人短缺率近13%，最少欠1300人，所以「絕對支持」政府為建造業輸入1.2萬個勞工，但同時呼籲政府盡快推廣同加強培訓，吸引本地人入行。
聯會今年4月向屬下會員做調查，噚日發表結果，工地嘅機電工人需求萬幾人，但只有9031人開工，仲欠1345人，當中以屋宇保安及通訊工人缺人最多，達49.43%；其次係機械打磨工人，缺31.14%。其他工種例如水渠、水喉、電氣工種等都唔夠人。
聯會又話，往後5年嘅建造業整體工程總額每年平均超過3000億元，政府都估計到2027年建造業勞工短缺將增至4萬人，所以希望政府可以幫手解決人力短缺，以應付未來嘅工程量。
