【時報訊】全球變暖，近年夏季氣溫屢創新高，環境及生態局噚日公布2021年香港溫室氣體排放清單，全年排放咗3470萬公噸二氧化碳，按年升約4%。局方解釋，二氧化碳排放量上升嘅主因係2021年新冠疫情較平穩，帶動本地經濟活動恢復，用電需求回升，加上3月、5月同9月均錄得破紀錄高溫，2021年發電量較2020年升咗約4%。
發電一向係本地溫室氣體嘅主要排放源，2021年發電佔整體排放量約62.7%，其餘主要排放源為運輸界別（18.7%）、廢物處理（8.4%），加埋已佔整體排放量約九成。
政府爭取喺2050年前實現碳中和，2021年排放量不跌反升，政府話初步數據顯示，2022年嘅溫室氣體排放量按年回落到與2020年相若。
事實上，2021年香港人口少咗1%，但人均排放量按年升約5%，政府真係要再諗下計，點樣加強推動全民節能減碳。
