【時報訊】立法會噚日通過《2023年區議會（修訂）條例草案》，去到全體委員會審議階段，議員應就條例草案嘅修訂內容發言，但選委界別議員、眼科醫生林順潮（圖）發言時，提到以往嘅區議會制度有漏洞，認同特首李家超曾提及應從制度上防止區議會亂象等等，好快就被立法會主席梁君彥截停話：「請你喺修訂上發言，好嗎？」最後林醫生重申支持草案，便結束發言。
新一屆議員上任一年半，議會都審議並通過咗唔少議案，過往都試過有議員發言唔對題或者唔符合程序嘅時候，要主席出言「提點」。睇番立法會議事規則第56條（1）列明，「獲付委某法案的任何全體委員會或專責委員會，只可討論是否支持就該法案提出的修正案」，唔可以討論相關法案嘅整體優劣同原則。
