【時報訊】由無政黨立法會議員組成嘅「G19」聽日（8日）出訪珠海同橫琴考察兩日，其間會討論如何善用港珠澳大橋。「G19」爭取大幅降低大橋嘅私家車收費，建議由150元減至100元人民幣或以下。對於會否影響大橋回本，旅遊界姚柏良話大橋斥資逾千億元興建，難以單靠車輛收費回本，最重要係促進經濟發展嘅間接效益。
姚柏良：靠車輛收費難回本
促經濟發展間接效益關鍵
「G19」一眾議員考察期間會同珠海市領導會面，並會參觀橫琴粵澳深度合作區、珠海高新技術產業開發區等；亦會同內地討論善用港珠澳大橋，將定位由集中貨運轉為客運、貨運皆宜。姚柏良話，𠵱家港珠澳大橋收費較貴，而連接深圳同中山嘅「深中通道」路程更短，期望大橋盡快將私家車收費減至100元人民幣或以下，確保「深中通道」通車後大橋仍能維持競爭力。
至於減價會唔會影響大橋回本，姚柏良認為促進大灣區人流同物流互通嘅間接效益更重要。建測規園界謝偉銓就希望，大橋應爭取做到「兩地一檢」或「三地一檢」，重申帶動區內經濟提升，得益先會最大。
