【時報訊】立法會財委會噚日通過公務員加薪方案，全體公務員最快今個月底「出新糧」同補發差額。今次公務員加人工，議會內無太大爭議，但唔少議員就關注局方點樣提升公務員士氣等議題，財委會主席陳振英一度提醒議員，話發言「偏離咗委員會工作」，應該集中討論財務安排。
論增士氣搶人才 議員「離晒題」
加薪方案訂明，低、中層公務員劃一加薪4.65%，首長級及高層公務員會加薪2.87%，追溯期至今年4月1日，方案將為政府帶來每年額外開支115億元。公務員事務局長楊何蓓茵會後喺社交平台「報喜」，話公務員薪酬調整方案獲通過外，財委會仲通過埋公務員事務局開設5個首長級職位，感謝一班議員。
勞聯林振昇話加幅影響公務員士氣，過往經歷社會事件同疫情，質疑點解唔加多啲。另外有唔少議員關注局方點「搶人才」、「留人才」，到會議後段，自由黨李鎮強問局方會點「搶人才」，特別係吸引海外學生回港，呢個時候陳振英就提醒議員，「我哋係傾財務建議，大家喺度講政策、講公務員，就有啲已經偏離咗委員會嘅工作」。
