【時報訊】立法會「G19」議員早前考察澳門，相隔一個月後又一連兩日去咗珠海同橫琴考察。今次行程都幾豐富，內容同創科、中醫藥有關，包括參觀橫琴粵澳深度合作區展示廳，親身體驗無人車項目、粵澳合作中醫藥產業園、珠海先進集成電路研究院等；又去咗橫琴口岸參觀，體驗「兩地一檢」模式入境澳門特區。一眾議員大讚過關安排方便快捷，覺得可以加強澳門同橫琴、珠海同埋大灣區嘅合作發展，認為香港應積極考慮喺港珠澳大橋、其他跨境口岸參考採用。
今次去考察嘅只有10名議員，有份協助籌備嘅科技創新界邱達根就話，喺珠海參觀咗珠海國家高新區科技創新展示廳，了解咗營商環境、為招商引資等方面政策措施嘅發展軌迹，仲去埋園區內一間本港大學畢業生喺內地創業嘅無人艇公司參觀。邱達根話好高興今次考察可以睇到高新區喺產業發展方面有良好規劃，認為當中有唔少支持政策留住人才同資金，為香港科研、創業青年提供多一個平台，又話會向政府反映今次所見所聞。
相關字詞﹕邱達根
