【Emily】美領事等赴立會酒會廖長江：無講政治嘢

【時報訊】立法會噚日邀請一眾駐港總領事出席交流酒會同參觀立法會大樓，有唔少曾關注香港立會選舉改制「收窄民主成分」嘅國家或地區代表都有出席，包括美國駐港澳總領事梅儒瑞、歐盟駐港澳辦事處副主任露安。44名出席駐港總領事或副總領事中，包括俄羅斯同白俄羅斯嘅副總領事、緬甸駐港總領事。

梅儒瑞同部分議員有短暫交談，如建制派「班長」廖長江、陳振英、陳健波等，佢離開立法會時揮手作揖，無停低回答提問。廖長江會後話席間介紹咗其他議員畀美領事識，無講政治嘢。新民黨何敬康話雙方講吓美國公司在港發展。民建聯李慧琼話行勻全場都見唔到對方。

有議員「硬橋硬馬」，如工聯會梁子穎會後話，同澳洲駐港澳總領事華怡德講，盼澳洲遵守一個中國原則，重申台灣係中國不可分割一部分。有議員同領事攬頭攬頸，民建聯何俊賢帶咗支中國商人投資、南非生產嘅花雕酒，送畀南非駐港總領事Mojalefa Mogono。