【時報訊】立法會噚日舉行「特首互動交流答問會」。特首李家超頻派高帽，讚體演文出界議員霍啟剛對推動文藝發展充滿熱誠，仲話霍係「俏哥」，有助推動文化事業；又讚喺城大法學院教書嘅經民聯梁美芬係法律人才、桃李滿門。
霍啟剛噚日就文藝發展向李家超拋出多項建議，李回應時先大讚霍，「你對文化藝術推動嘅熱誠，我係深深感受到」，話有信心佢作為文化委員會成員會提供好意見。李仲話：「有啲人講，個人去推廣都重要，我知道啟剛你有『俏哥』之稱，會幫到我哋整體推動文化事業。」
梁美芬發言時關注本港點樣培育法律人才，李形容佢係優秀法律人才，「就以梁議員你嚟講，你都喺法律界工作多年，我亦知道𠵱家好多成功嘅法律執業者都係你學生，桃李滿門，恭喜你」。
本身係「港漂」嘅選委會界別議員譚岳衡以普通話發問，李亦以普通話回應，感謝譚畀機會佢首次喺立法會講普通話，仲自嘲話「我盡量吧，你糾正一下，聽不懂的你說」，引來哄堂大笑。
