【時報訊】今個暑假一眾立法會議員好忙碌四圍去，選委界別議員吳傑莊（Johnny）上月底去完內蒙古，近日考察韓國，噚日就去咗位於南北韓邊境嘅非軍事區（DMZ）。Johnny形容DMZ係一個真正獨特嘅地區，匯集咗歷史、文化同自然美景，仲係窺視世界上最隱秘國家之一嘅地方。佢話參觀咗「6.25戰爭博物館」、「第三地道」及「都羅展望台」，其中喺地道仲深入地底，體驗地面同地底嘅溫差；喺展望台可以飲住茶欣賞朝鮮風景，佢認為香港都有一定參考價值。
有人去考察，有人同屋企人散心。工聯會鄧家彪趁住同家人喺成都旅行期間試搭當地嘅「空鐵」，大讚車廂時代感強、行車穩定。近日社會討論緊東九龍線可行性研究，鄧家彪希望政府可以研究唔同技術，例如空鐵。
民建聯鄭泳舜就同家人返鄉下汕頭濠江，日前一到埗就去咗跑步，其間路經新落成嘅潮汕體育館，原來呢個體育館本身係為咗第三屆亞洲青年運動會而改造，惟亞青會最終因新冠疫情取消，場館現時開放畀公眾使用。鄭泳舜就希望政府效法，遲啲可以開放啟德體育園畀公眾，實踐全民運動。
