【時報訊】立法會綜合大樓擴建工程展開近一年，主席梁君彥噚日同相關政府部門職員去咗視察工程進展。梁君彥喺社交平台話，今年雨量較多，令擴建工程進度略受影響，工程承辦商𠵱家會全力追回進度。
梁君彥話，承辦商正喺天台興建結構層及3個升降機塔同樓梯塔，預計工程下月底完成。到時喺內地江門生產嘅議員辦公室組裝合成組件亦會經水路運抵香港，10月起就會開始喺11樓至14樓議員樓層安裝，預計年底前完成裝嵌工程。
梁君彥又話，其中一個升降機大堂加建第四部升降機嘅工程亦如火如荼，佢噚日都去咗分域碼頭工地參觀模擬新升降機，同埋議員樓層嘅模擬升降機大堂；又提到立法會綜合大樓嘅兩個大堂都會用全新升降機，並改用升降機目的地控制系統，期望可以縮短等候時間。
