【時報訊】超強颱風「蘇拉」上周襲港，多區出現塌樹、垃圾遍佈街頭，多名立法會議員同區議員喺風暴遠離後，紛紛第一時間落區協助清理路面。其中民建聯梁熙同選委界梁毓偉都到港島東幫手清理塌樹，確保市民外出安全；西貢區議員方國珊就上門協助「爆玻璃」嘅單位用木板圍封窗戶，免生危險。
前日仍然懸掛8號風球之際，梁熙同多名黨友到港島東多處觀察破壞情况，戴上手套、出動手鋸等工具鋸開塌樹，搬走阻塞道路嘅雜物。梁毓偉就聯同一眾青聯、菁英會嘅成員，到柴灣清理街頭塌樹同雜物。實政圓桌田北辰就做足安全措施，戴頭盔落區，協助清理斷枝，佢話今次外判商較5年前「山竹」襲港後派出更多人手同工具清理路面，認為政府有很大進步。
今次風暴期間多區出現「爆玻璃」情况，方國珊話將軍澳多個屋苑都有單位「爆玻璃」，整幅玻璃破裂，但由於屋苑工程部前日未復工，佢同團隊就喺8號風球下上門，幫居民先用木板臨時圍封窗戶，以免造成進一步破壞。
