【時報訊】任職社區組織協會（SoCO）幹事多年嘅前支聯會副主席蔡耀昌（九哥，圖，蔡facebook圖片）早前辭職，並加入由工運領袖韓東方創辦嘅「中國勞工通訊」擔任副主任。九哥同Emily話，一直關心內地民間社會同勞工權益，希望喺新崗位可以有新嘗試同貢獻，會幫手做研究、宣傳同教育等工作。
九哥表示，今年7月正式離開工作多年嘅社協，本月轉職推動內地勞工權益嘅「中國勞工通訊」。佢話同曾參與八九民運嘅韓東方認識多年，對方邀請佢加入，佢亦有意作新嘗試，二人一拍即合。對於未來工作，九哥話仍需時間摸索並與同事討論，但「中國勞工通訊」一直有研究內地政策、工會發展等，相信會幫手研究，並協助宣傳同教育研究成果。
至於會唔會擔心工作性質敏感，九哥自言曾參與支聯會工作多年，原則為公義、本住良心，並以溫和踏實嘅方式做嘢，話不論政治環境轉變，總有空間。
