【時報訊】噚日係警察隊員佐級協會46周年會慶，係協會自2018年後再次舉辦會慶，主席林志偉同警務處長蕭澤頤致辭時，都不約而同呼籲同袍喺12月10日區議會選舉投票。林sir話「投票除咗係公民責任外，亦係一種姿態，畀所有人知道『愛國者治港』理念同改革後嘅區議會工作得到支持」，更呼籲同袍推動同事及家人投票。佢並用指南針比喻警察，指引市民解決問題。
林sir話，選舉當日好多同事會有特別工作安排，「唔緊要，我哋可以開工前去投票、收工後去投票」。
一哥：調整要求後 投考警員增七成
一哥亦呼籲同事一盡公民責任，鼓勵朋友家人投票。佢亦提及協會一直擔任管理層同前線溝通橋樑，好似近排廣受同事歡迎嘅「休假日工作特別酬金」，都係來自前線畀管理層嘅意見。據了解，有關計劃8月底推出，畀前線警員選擇將補假換錢。蕭sir又提到，今年5月調整入職要求後，截至9月有3597人投考警員，比去年同期升咗71.7%；投考督察有2376人，上升54.1%。
另外，協會近日委任咗兩個新任名譽會長，分別係行政會議成員陳健波同全國人大代表陳振彬，佢哋噚日都有出席會慶同上台致辭。
