【時報訊】民建聯立法會議員鄭泳舜噚日一副「武裝」現身體育館，話「好高興完成人生第一次劍擊比賽」。佢話噚日嘅劍擊活動有逾300多名選手分唔同組別參與，以後生仔為主，而佢係初哥，參加較年長組別，講笑話呢啲組別參加者人數較少，只有8人，所以佢都攞到第三名，「對我這些中年人也是一種鼓勵」。政府提出興建劍擊館，關注體育政策嘅阿舜希望盡快落實，幫助劍擊項目發展。
江玉歡慈善跑 「慢速」行完12公里
另外，慈善團體苗圃行動噚日辦慈善越野馬拉松，立法會議員江玉歡同部分藝人都有為籌款出力。越野賽分唔同級別，包括42、26、12公里賽跑，江玉歡志在參與，參加12公里賽，要喺12小時內跑完山徑。江玉歡話自己唔算跑手，但最後都可以開心衝刺，笑稱「以比較慢的速度行足全程」。佢話新冠疫後唔少慈善機構籌款都遇到困難，不少服務受影響，故想出一分力。
苗圃行動話，為增加今年賽事挑戰性及新鮮感，加入咗新元素，42公里改為循環線，以大埔為起點及終點。今年活動係為基層家庭服務及其他資助項目籌款，截至前日累積善款超過94萬元，捐款截止日期為11月30日。
