【時報訊】立法會噚日早上舉行暑假休會後首場前廳交流會，由副財政司長黃偉綸率領官員出席。對於有議員質疑「解決劏房問題」工作組要用10個月研究同提出建議需時太長，領導工作組嘅黃偉綸會後表示，唔認為用10個月調查研究、提出建議嘅時間寬裕，強調要小心訂立劣質劏房標準，如果標準太低社會唔接受，標準過高就不切實際。
前廳交流會有黃偉綸、房屋局長何永賢、勞福局長孫玉菡等官員出席，近60名議員參與。黃偉綸話，解決劏房問題嘅工作要清楚考慮，包括訂立劣質劏房標準、研究過渡和後續安排等。佢指出，建築結構、消防安全等標準較容易定義，惟涉及住戶生活範疇要小心考慮。
交流會亦討論「搶人才」措施，孫玉菡話，輸入外勞嘅「補充勞工優化計劃」至今收到1700宗申請，涉及1.9萬個職位，主要工種包括飲食、零售同保安。勞聯林振昇反映，由於保安員通常為中高齡者，憂慮大規模輸入外勞影響本地就業機會，促請當局嚴格審批。
