【時報訊】本報噚日報道，用導管餵食嘅嚴重智障者隻可以申請輪候入住小欖醫院，嚴重弱智人士家長協會引述社署話，初步考慮容許透過殘疾人士住宿服務評估機制嘅酌情渠道，畀呢批嚴重智障者申請入住嚴重殘疾人士護理院。協會噚日就話收到家長感謝卡報喜，社署終於酌情批準咗第一個使用胃造口餵食嘅嚴重智障學生可以輪候社署住宿服務，孩子有望喺社區院舍居住。
協會喺facebook話，過去多年一直為呢一班孩子同家長爭取多個選擇，今年終於有進展，期望社署可以盡快公布酌情審批嘅條件同埋所需文件，畀社工同家長可以跟從。協會又提到，社區仍然欠缺對用導管餵食嚴重智障者嘅支援，服務機構往往以人手不足為由，唔能夠提供日間服務、日間暫託或暫宿，希望社署繼續改善服務，畀照顧者可以喘息。
