【時報訊】創新科技及工業局長孫東呢排去咗德國外訪，繼出席2023年亞洲柏林峰會，同柏林市長會面後，孫東轉咗去漢堡到訪安世半導體製造廠（Nexperia），聽取該公司嘅發展方向同最新技術。安世半導體雖然喺香港科學園設有研發設施，但孫東都鼓勵佢哋積極考慮喺香港開展並擴展業務，並期望有更多國際龍頭科技企業，包括從事微電子研發及生產嘅公司來港。佢又去咗推廣人工智能嘅組織「AI.Hamburg」，聽對方推廣人工智能嘅廣泛應用。
睇番資料，安世半導體係總部設於荷蘭嘅中資企業，屬上海上市嘅聞泰科技旗下全資子公司，喺漢堡同英國曼徹斯特設廠，其他歐美亞洲地方都有研發或銷售點。不過，英國政府舊年11月以國家安全為理由，命令安世半導體須解除一宗涉及英國電腦晶片廠嘅已完成收購，要放售番86%嘅股份，至今為止，安世半導體未正式售出股份，但據報已有其他半導體公司有意洽購。
