【時報訊】前日「大暑」後，噚日天氣持續炎熱，正午時分全港大部分地區氣溫都有33℃或以上。工聯會黃國、郭偉強、梁子穎、葉偉明齊齊到興建緊嘅啟德體育園地盤，同承建商向工友派發雪糕、水果、水樽等，希望幫工友降降溫。
今次派雪糕活動係由香港建造業總工會主辦、工聯職安健協會協辦嘅「預防工作中暑推廣活動」之一，希望透過向地盤工友派發預防中暑物資傳遞相關職安意識，同時關心一班喺酷熱天氣下工作嘅員工。
立法會議員黃國話，勞工處訂定嘅「工作暑熱警告」複雜，難以操作，搞到僱主同工友都不滿。佢又話，建造業界提出指引改善建議，當勞工處發出工作暑熱警告時，就安排定時休息時段，認為建議既簡單又容易執行，值得肯定同支持。
