【時報訊】最近出版新書《閱讀新聞——專業價值和媒體批判》嘅中大新聞與傳播學院教授李立峯，噚日喺網台節目接受民主黨前主席劉慧卿訪問，講到近年嘅新聞自由。卿姐問李立峯會畀香港新聞自由幾多分，李話唔會畀分，但承認主流媒體少咗好多批判報道，而新聞自由嘅問題唔止係媒體夠唔夠膽做，亦關乎有冇人夠膽講。
李立峯提到，一個調查報道要出到街，內容一定要「紮實」，往往需要兩三個消息來源，但𠵱家肯講嘢嘅人少咗，「一個（消息來源）都唔容易」。
李立峯話學院無統計畢業生入行人數，但反修例運動前都唔多，而且每年都有浮動，當然同行業待遇有關，但係佢認為𠵱家「社會咁嘅狀態」，大家都知做記者艱難，仍然願意入行嘅人數唔多，不過相信「質」係好好，甚至比過往嘅畢業生更清楚想做乜，更有想法。
