【時報訊】中秋節人月兩圓，對於剛出獄嘅社運人士就份外珍惜。因幹犯《港區國安法》入獄嘅前賢學思政召集人王逸戰（圖）上星期刑滿出獄，佢喺facebook發帖話慶幸今年中秋終於可以同家人團聚，形容「這種最平凡的幸福，對於身陷囹圄的人仍是一種奢侈的願望」。
王逸戰喺fb話，中秋節令佢諗起兩年前被捕同家人分離，慶幸今年終於可以同家人一齊賞月食月餅。佢話呢種最平凡嘅幸福，對身陷囹圄嘅人係一種奢侈嘅願望，祝願「牆內的朋友能早日與珍愛的人團聚」。
阮民安出獄 對所做嘅事「心安理得」
至於因為煽動罪及洗黑錢入獄嘅歌手阮民安，亦喺噚日中秋節出獄。佢離開監獄後向傳媒表示，身處獄中每分每秒都好痛苦，但對於所做嘅事感到心安理得，至於未來計劃，佢就話稍後再向公眾交代。
