【時報訊】立法會工務小組委員會成員噚日去石鼓洲外海嘅人工島，考察本港首座焚化爐、處理都市固體廢物轉廢為能設施I．PARK1【源．島】嘅工程進度，成員之一嘅張欣宇（Gary）係工程師，佢話考察期間喺地盤辦公室遇上多年無見嘅大學土地系同班同學，藉機敘舊。Gary又話，每次實地考察都可以更清楚睇到基建項目情况，有助佢將來審批各項撥款時有更清晰嘅概念。
I·PARK1將於2025年投入運作，民建聯顏汶羽引述環保署指出，呢項設施有12個巨型機電設備預製組件，當中多個已經由珠海經水路運抵香港，目前正在組裝，預料餘下組件明年首季陸續運到。
不過，顏引述署方提到，由於項目地點偏遠，工人返工放工時間長，亦需要特定嘅技術，但香港呢方面工人嚴重不足，所以對工程進度有一定影響。
