【時報訊】漁護署喺網上公布，佢哋嘅檢疫偵緝犬近日加咗一名生力軍，呢位新星就係比格犬Bmo，佢啱啱完成咗偵緝犬訓練，正式喺入境口岸返工。據漁護署介紹，Bmo係一隻近兩歲嘅狗女，今年先加入偵緝犬隊伍，形容佢性格活潑、為食，同埋有探索精神，即係好啱擔任偵緝犬啦。
漁護署話，部門嘅偵緝犬會喺各入境口岸執勤，負責偵察同打擊走私檢疫物品。偵緝犬經訓練後能夠用嗅覺辨認受管制物品，即使啲嘢收埋喺行李或多層衣物入面，都難佢哋唔到。至於Bmo，大家除咗會喺口岸有機會見到佢，署方話嚟緊喺公共交通工具上都會見到佢同其他偵緝犬嘅宣傳片。
漁護署不忘提醒市民，進口哺乳類動物（例如貓、狗）或佢哋嘅衍生物（例如貓、狗屍體、身體部分）、鳥類同爬蟲類等，都受香港法例管制；任何人進口或經香港轉口動物，必須先得到該署簽發嘅特別許可證，並須符合證上訂明嘅條款，違者可被檢控。
