【時報訊】聖誕節將至，街上各處都見到各式節日裝飾，海濱事務委員會同社企Alchemist Creations都有個大型聖誕活動，喺銅鑼灣避風塘設置多個大型藝術裝置，全部裝置都由殘疾人士親手製造，包括一棵由1萬個回收汽水罐升級再造嘅6米高聖誕樹。
呢棵聖誕樹由基督教家庭服務中心翠林綜合職業復康服務嘅殘疾學員製造，佢哋仲製作咗一個由聖誕老人、雪人同薑餅人組成嘅合唱團，同埋一組3件既可打卡又可坐嘅列車，全部都係用汽水罐升級再造。參與製作學員有超過20人，佢哋先去餐廳收集鋁罐，整成所需形狀後打磨，再逐粒逐片組裝，歷時一個半月。
今次嘅聖誕活動即日起至明年1月2日舉行，亮燈時間由下午5點至晚上11點，周五（22日）至1月1日期間延長至翌日凌晨1時。
