【時報訊】聖誕長假期各口岸迫滿離港者，官員噚日於社交媒體發帖，繼續呼籲市民留港消費，有立法會議員就趁長假前北上考察，旅遊界議員姚柏良發帖話跟立法會團去咗上海，了解當地最新海濱河濱發展、舊區重建和文化保育工作，作為旅遊界代表，佢登上國產第一艘大型郵輪「愛達．魔都」號，喺首航前深度了解船上設施和郵輪碼頭配套。姚柏良喺facebook上載嘅照片顯示佢仲去咗「張園」，張園係上海現存最大、保存最完整嘅石庫門建築群，佔地約6萬平方米，可追溯至1882年。
民建聯議員顏汶羽亦發文話自己經常鼓勵青年多到外面走走，了解不同文化和機遇，佢就趁立法會休會帶領青年民建聯到「一帶一路」巴爾幹半島交流，行程包括拜訪中國駐塞爾維亞領事館，又會與當地大學生交流，以及參觀名勝古蹟。
高官近日到多區視察消費，噚日就有政務司長陳國基發文話去咗香港故宮文化博物館欣賞「從波提切利到梵高：英國國家美術館珍藏展」；副財政司長黃偉綸就話佢日前專程去廟街夜市與市民一同「掃街」，品嘗地道小食，包括牛雜、煎釀三寶，同土耳其咖啡等，佢話現場人山人海，感謝各界積極響應「夜繽紛」活動，讓市民和遊客一同感受晚上市面熱鬧嘅氣氛。
