【時報訊】近日乍暖還寒，教育局早前舉辦咗親子鈎織大行動，參與活動嘅家長同學生喺一個名為「正向家長運動」嘅活動日，合力將鈎織出來嘅方塊，拼合成百幾條色彩繽紛嘅圍巾，日前仲將圍巾送去安老中心。
日前教育局義工隊聯同20幾個喺活動中獲得「最積極參與獎」嘅學校家長及學生，到東華三院賽馬會朗逸居探訪，當日有40幾個院舍長者參加活動，家長及小朋友除咗向長者送上圍巾，亦有同長者一齊傾偈、玩遊戲。
教育局話通過今次探訪活動，同學可以學習關懷同了解長者需要，仲學懂尊重同欣賞長者，而「正向家長運動」係教育局自2020年起推出嘅活動，透過唔同活動向家長及公眾宣揚教養子女嘅正確方法同態度，包括舉辦親子手作坊等。
