【時報訊】立法會新一年會期展開在即，民建聯李慧瓊同金融界陳振英分別連任內務委員會及財委會主席，兩個委員會嘅副主席就雙雙換人，其中內會副主席由保險界陳健波（波哥）接替選委界馬逢國。
李慧瓊陳振英連任主席
已經擔任4年內會副主席嘅馬逢國今年退下火線，由陳健波接任，後者喺無競爭下自動當選。波哥表示，本身無打算參選內會副主席，不過獲李慧瓊邀請，遂答允對方。曾做財會主席多年嘅波哥，去年因成為行會成員而辭職，今次做內會副主席，佢話一定出席內會，而且會議時間一般較短，相信工作量唔會增加。
不過，由於內會副主席須於立法會主席及內會主席缺席時擔任大會「代主席」，波哥話雖然做咗十幾年議員，主持大會具一定複雜程度同挑戰，需把握時間溫習《議事規則》。
財委會副主席同樣換人，由民建聯周浩鼎自動當選，接替自由黨航運交通界易志明。周浩鼎話衷心感謝一眾議員嘅信任，未來會竭力與財會主席合作，確保財會運作順利。
