【時報訊】騙徒手法層出不窮，近日有讀者話喺WhatsApp收到信息，聲稱監測到用戶帳號長時間未驗證，要求登入信息內嘅網站連結，證明仍然用緊，又話未驗證嘅號碼會喺8小時後永久停用。據Emily了解，相關短訊並唔係來自WhatsApp。
Emily噚日用警方嘅「防騙視伏器」搜尋，結果話相關網站「疑似有伏」，即係「網址有相近嘅詐騙舉報紀錄」，提醒瀏覽者要進一步搜尋其他資訊，包括電話及銀行戶口等評估風險。
WhatsApp網站提到，平台只有部分情况會向用戶發短訊，包括建立新帳戶或再次註冊現有帳戶先會收到提示短訊，確保用戶擁有呢個手機號碼，之後可以用嚟接收驗證代碼。另外，當申請驗證碼重啟帳戶時，如果輸入錯誤嘅用戶號碼，原本嘅用戶會收到驗證碼短訊同埋傳送推送通知，提醒有人嘗試緊接管帳戶。
相關字詞﹕詐騙
