【時報訊】民建聯領導層去年換屆後成立「聯絡拓展委員會」，專責與海外交流。民記副主席周浩鼎（Holden）噚日喺傳媒茶敘話，該黨計劃今年率團出訪中東，以民間交流幫助香港拓展經濟。至於會否就23條立法到歐美國家解說，Holden話暫時未有打算出訪當地，但一直有與在港外國商會溝通。
本港積極拓展「一帶一路」市場，民建聯繼前年出訪東盟，計劃今年前往中東，協助香港發展當地市場。Holden話會考慮邀請工商界一齊去，具體時間同目的地仍待研究。佢認為本港發展中東市場要先做好配套，例如增加兩地直航航班，方便當地商界來港。
民建聯亦成立「建設發展委員會」，推動本港融入國家發展、與內地合作等。負責委員會嘅民記副主席陳勇表示，對向中央爭取再送贈兩隻大熊貓予香港一事「愈來愈有信心」，希望十一國慶前能成事。
