【時報訊】復活節假期大批市民外遊，議員都唔例外。行政會議成員湯家驊就同一大班高球友組團去意大利羅馬市郊度假及打波，話小鎮度假酒店環境寧靜，有閒情坐喺湖邊欣賞風景；離開小鎮不遠有一間米芝蓮一星餐廳，一支相當唔錯嘅知名紅酒只賣50歐元，晚飯食咗4個多小時，真正享受慢活。
田北辰遊成都 話唔一定係去深圳
實政圓桌立法會議員田北辰就偕太太外孫等去咗四川成都旅遊，包括參觀武侯祠，話武侯祠係三國時代蜀國著名軍師諸葛亮嘅專祠。田二少話放假唔一定只係去深圳食嘢買嘢，都可以遊覽吓其他省市，了解歷史及鄉土民情。
經民聯主席盧偉國就喺剛過去嘅周末同一班友好組成美食團去潮汕「搵食」，佢話本想坐高鐵，但買唔到車票，改為周五晨早由蓮塘口岸過關，搭巴士直去汕頭。
「雙林」議員留港擺站派禮物
至於假期留港議員，勞聯林振昇噚日伙拍林素蔚喺將軍澳擺街站，向街坊派發復活節小禮物。民建聯顏汶羽就同家人留港行街食飯買嘢，話香港都有好多品質好又價錢相宜嘅貨品，呼籲大家一齊發掘吓香港新嘅遊玩地方。
