【時報訊】首次由粵港澳三地聯合承辦嘅第十五屆全運會喺明年舉行，大會徵集會徽、吉祥物、主題口號同音樂作品，入圍同勝出嘅獎金好豐富，其中10件會徽同10件吉祥物嘅入圍作品，每件有1萬元人民幣獎金，而勝出嘅一件會徽同吉祥物作品，各獎12萬元人民幣。
據全運會網站，參加者嘅作品要符合四大要素，包括綠色、共享、開放、廉潔嘅辦賽理念；簡約、安全、精彩嘅辦賽要求；創新、融合、引領嘅辦賽特點；國際標準、中國氣派、嶺南風韻嘅辦賽目標。其中，主題口號嘅要求仲要「能夠打動人心，令人印象深刻」，而音樂作品就要「彰顯中國新時代、粵港澳文化的獨特魅力，提升中華優秀傳統文化的感召力和影響力」。
提提你，主題口號、會徽、吉祥物同音樂作品嘅截止日期分別係4月30日、5月15日、5月31日同9月30日，需透過全運會網站提交應徵作品嘅電子版，同埋同步郵寄應徵作品同相關文件嘅紙質版去指定收件地址。
相關字詞﹕全運會
