共創明「Teen」校友會青年委員噚日舉行就職禮，政務司長陳國基（右一）同校友交流，仲聽校友介紹佢哋喺團體活動做嘅手工作品。（陳國基fb）
【時報訊】第一期「共創明Teen」計劃學員上年11月舉行畢業禮，之後成立嘅「共創明Teen校友會」畀一班同學仔繼續參加唔同活動。其中70人被挑選為青年委員，組成7個青年委員會，負責聯繫各區嘅「校友」同策劃活動，噚日朝早仲喺迪士尼樂園酒店舉行就職禮。政務司長陳國基都有出席，佢喺facebook話聽咗一班畢業學員分享校友會成立後嘅各項活動，又睇咗佢哋特別準備嘅跳舞同唱歌表演，話大家嘅表現令佢刮目相看，感動之餘仲好欣慰。佢話，希望各委員能夠將計劃入面學到嘅知識技能學以致用，向「師弟妹」分享經驗，長大後擔任友師，貫徹薪火相傳嘅精神。
負責籌辦校友會嘅東華三院主席韋浩文致辭話，校友會為畢業學員提供一個全面嘅學習平台，畀佢哋開闊眼界、建立正向人生觀，同為未來定立目標，希望各位學員把握機會，積極參與活動，凝聚青年力量，積極貢獻社會。
相關字詞﹕陳國基 共創明teen
免责声明：本文仅代表作者个人观点，与华侨网无关联。其原创性及文中陈诉内容未经本网证实，对本文内容、文字的完整、真实性，以及时效性本网部作任何承诺，请读者自行核实相关内容。如发现稿件侵权，或作者无意愿在华侨网发布文章，请版权拥有者通知华侨网处理。
