【明報專訊】本港展覽業隨住社會復常而逐步復蘇，會展管理有限公司董事總經理梅李玉霞（Monica）噚日同Emily講，新冠疫情前，會展全年會舉辦約110個展覽，其中70多個屬於企業對企業B2B（Business-to-Business）展覽活動，好高興喺2023至24年度全部回歸，一個都無少，其他各類展覽亦會繼續舉行，形容係「盛世回歸」。
Monica又話，會展耗資咗10億元做為期5年嘅服務提升工程，將於明年完成，包括會展各廁所1000多個廁格大翻新；會展大會堂燈光、牆身、地氈亦翻新及提升，未來5年亦會做硬件提升工作。會展向來係觀賞煙花最佳位置之一，Monica透露已有熟客機構口頭上預訂房間，如果今年國慶舉行煙花匯演，客人就可以近距離觀賞煙花。
